ସାଧନା ଜୁଏଲାରୀ ରୁ ବନ୍ଧୁକ ଦେଖାଇ ସୁନା ଲୁଟ୍

ପାରାଦ୍ଵୀପ ( ଏନ. ପି.ଓ ) : ଦ୍ବିପହରରେ ବନ୍ଧୁକ ମୁନରେ ସୁନା ଦୋକାନ ରୁ ୨୦ ଲକ୍ଷରୁ ଉର୍ଦ୍ଧ୍ବ ଟଙ୍କା ର ଅଳଙ୍କାର ଲୁଟ୍ ହୋଇଛି ।ପାରାଦ୍ଵୀପ ତାରେଣୀଗଡା ରେ ଥିବା ଏକ ସୁନା ଦୋକାନରେ ଘଟିଛି ଏଭଳି ଘଟଣା । ଏକ କଳା ବାଇକ୍ ରେ ଜଣେ ଯୁବକ ଆସି ଅଳଙ୍କାର ଦୋକାନ ଭିତରେ ପଶିବା ସହିତ କର୍ମଚାରୀ ମାନଙ୍କୁ ବନ୍ଧୁକ ଦେଖାଇ ଭୟଭୀତ କରାଇ ଦୋକାନରେ ଥିବା ୨୪ ଟି ସୁନା ମୁଦି ନେଇଯାଇଛନ୍ତି । ଖବର ପାଇ ପାରାଦ୍ଵୀପ ଆଦର୍ଶ ଥାନା ପୋଲିସ ଓ ଲକ୍ ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିବା ସହିତ ଦୋକାନ ରେ ଲାଗିଥିବା ସିସିଟିଭି ଫୁଟେଜ ଯାଞ୍ଚ କରୁଛି । ଏହି ଘଟଣା ଦିନ ପାଖାପାଖି ୩:୧୦ ରୁ ୩:୨୦ ମଧ୍ୟରେ ଘଟିଛି । ଦୋକାନ କର୍ମଚାରୀ ଙ୍କ କହିବା ଅନୁଯାୟୀ ଯୁବକ ଜଣଙ୍କ ଗତକାଲି ଦୋକାନ କୁ ଆସିଥିଲା ଏବଂ ମୁଣ୍ଡରୁ ହେଲମେଟ ଖୋଲି ଦୋକାନରେ ବୁଲି ଗହଣା ଦେଖିବା ପରେ ଚାଲିଯାଇଥିଲା । ତେବେ ଆଜି ହଠାତ୍ ହେଲମେଟ ପିନ୍ଧିବା ଅବସ୍ଥାରେ ଦୋକାନ ଭିତରକୁ ପଶି ଆସିବା ସହିତ ବନ୍ଧୁକ ଦେଖାଇ ଅଳଙ୍କାର ଦେବାକୁ କହିଥିଲା । ସମ୍ମୁଖରେ ଥିବା ୨୪ ଟି ସୁନା ମୁଦି ନେଇ ଚାଲିଯାଇଥିଲା । ତେବେ ଯୁବକ ଜଣକ ଗତକାଲି ଯେଉଁ ବାଇକ ଆଣି ଆସିଥିଲା ଆଜି ମଧ୍ୟ ସେହି ବାଇକ ଆଣିଥିଲା । ଗାଡ଼ିର ପଛ ନମ୍ବର ପ୍ଲେଟ୍ ରେ ଜରି ଘୋଡ଼ା ହୋଇଥିଲା ଏବଂ ଆଗ ନମ୍ବର ପ୍ଲେଟ୍ ସଠିକ୍ ଜଣାପଡୁ ନଥିଲା । ପୋଲିସ ଦୋକାନ ସିସିଟିଭି ଫୁଟେଜ ସହିତ ଆଖପାଖ ରେ ଲାଗିଥିବା ଅନ୍ୟ ସିସିଟିଭି ଫୁଟେଜ ମଧ୍ୟ ଯାଞ୍ଚ୍ ଆରମ୍ଭ କରିଛି ।