ଢିଙ୍କିଆ, ନୂଆଗାଁ ଓ ଗଡ଼କୁଜଙ୍ଗ ତିନିଟି ଗ୍ରାମ ପଞ୍ଚାୟତରେ ସ୍ୱାସ୍ଥ୍ୟସେବାକୁ ସୁଦୃଢ଼ କରିବା ଲକ୍ଷ୍ୟରେ JSW ଉତ୍କଳ ଷ୍ଟିଲ୍ ଓ JSW ଫାଉଣ୍ଡେସନ୍ ପକ୍ଷରୁ ଜରୁରୀକାଳୀନ OPD ସେବା ଆରମ୍ଭ

ପାରାଦ୍ୱୀପ ( ଏନ. ପି.ଓ ) : ଗ୍ରାମାଞ୍ଚଳରେ ସ୍ୱାସ୍ଥ୍ୟସେବାର ଭିତ୍ତିଭୂମିକୁ ସୁଦୃଢ଼ କରିବା ସହ ଜନସାଧାରଣଙ୍କୁ ତ୍ୱରିତ ଚିକିତ୍ସା ସେବା ଯୋଗାଇଦେବା ଦିଗରେ ଏକ ଉଲ୍ଲେଖନୀୟ ପଦକ୍ଷେପ ସ୍ୱରୂପ JSW ଉତ୍କଳ ଷ୍ଟିଲ୍ ଲିମିଟେଡ୍ ଓ JSW ଫାଉଣ୍ଡେସନ୍ ପକ୍ଷରୁ ନୂଆଗାଁ ଗ୍ରାମ ପଞ୍ଚାୟତ କାର୍ଯ୍ୟାଳୟଠାରେ ଜରୁରୀକାଳୀନ ବହିର୍ବିଭାଗ (Emergency OPD) ସେବା ଆରମ୍ଭ କରାଯାଇଛି ।
JSW ଉତ୍କଳ ଷ୍ଟିଲ୍ ଲିମିଟେଡ୍‌ର ସଭାପତି ଶ୍ରୀ ଅନିଲ କୁମାର ସିଂହଙ୍କ ନେତୃତ୍ୱରେ ଏହି ପଦକ୍ଷେପ ଢିଙ୍କିଆ, ନୂଆଗାଁ ଓ ଗଡ଼କୁଜଙ୍ଗ ଗ୍ରାମ ପଞ୍ଚାୟତର ଜନସାଧାରଣଙ୍କ ଜୀବନଧାରଣର ମାନ ଉନ୍ନତ କରିବା ସହ ସମାଜ କଲ୍ୟାଣ ଓ ମୌଳିକ ସ୍ୱାସ୍ଥ୍ୟସେବାର ସୁଯୋଗକୁ ସୁଦୃଢ଼ କରିବା ପାଇଁ ସଂସ୍ଥାର ନିରନ୍ତର ପ୍ରତିବଦ୍ଧତାକୁ ପ୍ରତିଫଳିତ କରୁଛି ।
ପୂର୍ବରୁ ଏହି ତିନୋଟି ଗ୍ରାମ ପଞ୍ଚାୟତର ଲୋକମାନେ ବିଶେଷକରି ରାତ୍ରି ସମୟରେ ଜରୁରୀକାଳୀନ ଚିକିତ୍ସା ଓ ପ୍ରାଥମିକ ଚିକିତ୍ସା ପାଇଁ କୁଜଙ୍ଗ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର (CHC) ଉପରେ ନିର୍ଭର କରୁଥିଲେ। ନିକଟରେ ରାତ୍ରିକାଳୀନ ଚିକିତ୍ସା ସେବାର ସୁବିଧା ନଥିବାରୁ ଜରୁରୀ ପରିସ୍ଥିତିରେ ଠିକ୍ ସମୟରେ ଚିକିତ୍ସା ପାଇବା ପାଇଁ ଗ୍ରାମବାସୀମାନେ ବହୁ ଅସୁବିଧାର ସମ୍ମୁଖୀନ ହେଉଥିଲେ ।
ଜନସାଧାରଣଙ୍କ ଏହି ଦୀର୍ଘଦିନର ଦାବିକୁ ଗୁରୁତ୍ୱ ଦେଇ JSW ଉତ୍କଳ ଷ୍ଟିଲ୍ ଓ JSW ଫାଉଣ୍ଡେସନ୍ ପକ୍ଷରୁ ନୂଆଗାଁ ଗ୍ରାମ ପଞ୍ଚାୟତ କାର୍ଯ୍ୟାଳୟଠାରେ ଏହି ଜରୁରୀକାଳୀନ OPD ସେବା ଆରମ୍ଭ କରାଯାଇଛି । ଏହି ସେବା
ଢିଙ୍କିଆ, ନୂଆଗାଁ ଓ ଗଡ଼କୁଜଙ୍ଗ ତିନୋଟି ଗ୍ରାମ ପଞ୍ଚାୟତର ଜନସାଧାରଣଙ୍କୁ ଉପଲବ୍ଧ ହେବ। ପ୍ରତିଦିନ ରାତି ୧୦ଟାରୁ ସକାଳ ୬ଟା ପର୍ଯ୍ୟନ୍ତ ଏହି ସେବା ଜାରି ରହିବ ।
ଏହି ସେବାକୁ ଅଧିକ ପ୍ରଭାବଶାଳୀ ଓ ସୁଗମ କରିବା ପାଇଁ ରାତ୍ରି ସମୟରେ ଜଣେ ପୂର୍ଣ୍ଣକାଳୀନ MBBS ଡାକ୍ତର, ଜଣେ ଉତ୍ସର୍ଗୀକୃତ ସହାୟକ ଏବଂ ଆମ୍ବୁଲାନ୍ସ ସେବା ଉପଲବ୍ଧ ରହିବ। ଏହାଦ୍ୱାରା ଜରୁରୀକାଳୀନ ପରିସ୍ଥିତିରେ ରୋଗୀମାନେ ତୁରନ୍ତ ଡାକ୍ତରୀ ପରାମର୍ଶ ଓ ପ୍ରାଥମିକ ଚିକିତ୍ସା ପାଇପାରିବେ । ଯେଉଁ ରୋଗୀମାନଙ୍କୁ ଅଧିକ ଉନ୍ନତ ଚିକିତ୍ସା ବା ହସ୍ପିଟାଲରେ ଭର୍ତ୍ତି ହେବାର ଆବଶ୍ୟକତା ରହିବ, ସେମାନଙ୍କୁ JSW ଆମ୍ବୁଲାନ୍ସ ଯୋଗେ କୁଜଙ୍ଗ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଯିବ।
ଏହି ପଦକ୍ଷେପ ଜରୁରୀକାଳୀନ ଚିକିତ୍ସା ସେବା ପାଇବାରେ ବିଳମ୍ବକୁ ହ୍ରାସ କରିବା ସହ ଅନେକ ଜୀବନ ବଞ୍ଚାଇବାରେ ସହାୟକ ହେବ ବୋଲି ଆଶା କରାଯାଉଛି । ଠିକ୍ ସମୟରେ ଚିକିତ୍ସା ଓ ତ୍ୱରିତ ଆମ୍ବୁଲାନ୍ସ ସେବା ଗ୍ରାମାଞ୍ଚଳର ଲୋକମାନଙ୍କ ପାଇଁ ଏକ ବଡ଼ ଆଶ୍ୱସ୍ତି ଆଣିଦେବ ।
ଏହି ସେବାର ଶୁଭାରମ୍ଭ ଅବସରରେ JSW ଉତ୍କଳ ଷ୍ଟିଲ୍‌ର ବରିଷ୍ଠ ଅଧିକାରୀ ଶ୍ରୀ ମନୋଜ ସିଂହ, ଉପସଭାପତି, JSW ଉତ୍କଳ ଷ୍ଟିଲ୍, ପାରାଦୀପ; ଶ୍ରୀ ମିତ୍ରଭାନୁ ଚୌଧୁରୀ, ଆସୋସିଏଟ୍ ଉପସଭାପତି, JSW ଉତ୍କଳ ଷ୍ଟିଲ୍, ପାରାଦୀପ; ଏବଂ ଶ୍ରୀ ଅଭିଜିତ ମହାନ୍ତି, CSR ମୁଖ୍ୟ, JSW ଫାଉଣ୍ଡେସନ୍, ପାରାଦୀପ ଉପସ୍ଥିତ ରହି ସେବାର ଶୁଭାରମ୍ଭ କରିଥିଲେ ।
ଏହି ଅବସରରେ ତିନୋଟି ଗ୍ରାମ ପଞ୍ଚାୟତର ପ୍ରମୁଖ ଜନପ୍ରତିନିଧି ଓ ସମାଜସେବୀଙ୍କ ମଧ୍ୟରେ ଶ୍ରୀ ସ୍ମୃତି ମନ୍ତ୍ରୀ, ଶ୍ରୀ ଯଦୁନାଥ ଖଟୁଆ, ଶ୍ରୀ ତାମିଲ ପ୍ରଧାନ, ଶ୍ରୀ ସମ୍ପଦ ବାରିକ, ଶ୍ରୀ କେଶବ ରାଉତ, ଶ୍ରୀ ରଞ୍ଜନ ବର୍ଦ୍ଧନ, ଶ୍ରୀ ପ୍ରଭାତ ରାଉତ, ଶ୍ରୀ ପ୍ରଶାନ୍ତ ଲେଙ୍କା, ଶ୍ରୀ ସନ୍ତୋଷ ମହାନ୍ତି ଓ ଶ୍ରୀ ସୁରେଶ ଚନ୍ଦ୍ର ଦାଶଙ୍କ ସମେତ ଅନ୍ୟାନ୍ୟ ଗଣ୍ୟମାନ୍ୟ ବ୍ୟକ୍ତି ଓ ଗ୍ରାମବାସୀ ଉପସ୍ଥିତ ଥିଲେ ।
ଏହି ଜନହିତକର ପଦକ୍ଷେପକୁ ତିନୋଟି ଗ୍ରାମ ପଞ୍ଚାୟତର ଜନସାଧାରଣ ଓ ସ୍ଥାନୀୟ ପ୍ରତିନିଧିମାନେ ଭୂୟସୀ ପ୍ରଶଂସା କରିଛନ୍ତି। ଦୀର୍ଘଦିନର ଦାବିକୁ ପୂରଣ କରି ଅଞ୍ଚଳବାସୀଙ୍କୁ ଅତ୍ୟାବଶ୍ୟକ ସ୍ୱାସ୍ଥ୍ୟସେବା ଯୋଗାଇଦେଇଥିବାରୁ ସେମାନେ JSW ଉତ୍କଳ ଷ୍ଟିଲ୍ ଓ JSW ଫାଉଣ୍ଡେସନ୍‌କୁ କୃତଜ୍ଞତା ଜଣାଇଛନ୍ତି ।
ଏହି ପଦକ୍ଷେପ ମାଧ୍ୟମରେ JSW ଉତ୍କଳ ଷ୍ଟିଲ୍ ଓ JSW ଫାଉଣ୍ଡେସନ୍ ଗ୍ରାମାଞ୍ଚଳରେ ସୁଲଭ ସ୍ୱାସ୍ଥ୍ୟସେବା, ତ୍ୱରିତ ଜରୁରୀକାଳୀନ ସହାୟତା ଓ ନିରନ୍ତର ଜନସମ୍ପର୍କ ମାଧ୍ୟମରେ ଏକ ସୁସ୍ଥ ଓ ସୁରକ୍ଷିତ ସମାଜ ଗଠନ ଦିଗରେ ନିଜର ପ୍ରତିବଦ୍ଧତାକୁ ପୁନର୍ବାର ପ୍ରମାଣିତ କରିଛନ୍ତି ।