ବିପିସିଏଲ ଡିପୋ ରେ ତୈଳ ଟ୍ୟାଙ୍କଲର ହେଲ୍ପରଙ୍କ ଠାରୁ ଦାଦାବଟି ଆଦାୟ ଅଭିଯୋଗରେ ଆଦର୍ଶ ଥାନାରେ ମାମଲା

ପାରାଦ୍ୱୀପ ( ଏନ. ପି.ଓ ) : ଦୀର୍ଘଦିନ ହେବ ପାରାଦୀପ ଟର୍ମୀନାଲ ନିକଟସ୍ଥ ବିପିସିଏଲ ଓ ଅନ୍ୟାନ୍ୟ ଡିପୋ ମାନଙ୍କରେ ଜଗତସିଂହପୁର ଏସପି ଙ୍କ ପ୍ରଚେଷ୍ଟାରେ ବଟି ଓ ଚାନ୍ଦା ଆଦାୟ ବନ୍ଦ କରାଯାଇଥିବା ବେଳେ ଏବେ ସେହି ଘଟଣାର ପୁନରାବୃତ୍ତି ଘଟିଛି l ତୈଳ ଡିପୋ ମଧ୍ୟକୁ ପ୍ରବେଶ ପାଇଁ ଡ୍ରାଇଭର ସହିତ ହେଲ୍ପର ରହିବା ବାଧ୍ୟତାମୂଳକ ହୋଇଥିବା ବେଳେ ଅନେକ ଗାଡ଼ିରେ ହେଲ୍ପର ନଥିବା ଯୋଗୁଁ ଡ୍ରାଇଭର ମାନେ ସ୍ଥାନୀୟ କାମଚଳା ବା ଆକାଳୀ ହେଲ୍ପର ନେଇଥାନ୍ତି l ମାସକୁ ୧୦ ରୁ ୨୦ ଟା ଡ୍ୟୁଟି ପାଇ ସେମାନେ କିଛି ଅର୍ଥ ରୋଜଗାର କରି ନିଜ ପରିବାର ପ୍ରତିପୋଷଣ କରିଥାନ୍ତି l କିନ୍ତୁ କିଛିଦିନ ହେବ ବାଲିଡିଆ ଗ୍ରାମର ଜନୈକ ତୁଷାର ସ୍ୱାଇଁ ଏହି ନିରୀହ ହେଲ୍ପର ମାନଙ୍କ ଠାରୁ ଜବରଦସ୍ତ ବଟି ଆଦାୟ କରୁଥିବା ନେଇ ଅଭିଯୋଗ ହେଉଛି l ଯେଉଁମାନେ ପ୍ରତିବାଦ କରୁଛନ୍ତି ସେମାନଙ୍କୁ ଧମକାଇବା, ମାଡ଼ ମାରିବା ଏବଂ ସେମାନଙ୍କ ଗୃହିଣୀ ମାନେ ପ୍ରତିବାଦ କଲେ ସେମାନଙ୍କୁ ଅଶାଳୀନ ବ୍ୟବହାର କରୁଥିବା ମଧ୍ୟ ଅଭିଯୋଗ ହୋଇଛି l ତେଣୁ ଶେଷରେ ବାଧ୍ୟ ହୋଇ ଅତ୍ୟାଚାରିତ ହେଲ୍ପର ମାନଙ୍କ ସହଧର୍ମିଣୀ ମାନେ ଏକାଠି ହୋଇ ଆଜି ଆଦର୍ଶ ଥାନାରେ ତୁଷାର ବିରୋଧରେ ଲିଖିତ ଅଭିଯୋଗ କରି ନ୍ୟାୟ ଭିକ୍ଷା କରିଛନ୍ତି l ଅନ୍ୟପକ୍ଷରେ ଏହି ସ୍ପର୍ଷକାତର ଅଞ୍ଚଳରେ ପୋଲିସ ପାଟ୍ରୋଲିଙ୍ଗ କୁ କଡାକଡି କରି ଅସାମାଜିକ କାର୍ଯ୍ୟକଳାପ ଉପରେ ନଜର ରଖିବାକୁ ସାଧାରଣରେ ଦାବୀ ହୋଇଛି l