ମା’ ରାମଚଣ୍ଡୀ ୟୁଥ୍ କ୍ଲବ ପକ୍ଷରୁ ଏକ ନିଆରା କାର୍ଯ୍ୟକ୍ରମ ଅନୁଷ୍ଠିତ

ପାରାଦ୍ଵୀପ ( ଏନ. ପି.ଓ ) : ପାରାଦ୍ୱୀପ ସ୍ଥିତ ମା’ ସନ୍ତୋଷୀ ଜରାଶ୍ରମ ପରିସରରେ ନିମିଡ଼ିହି ଗ୍ରାମର ମା’ ରାମଚଣ୍ଡୀ ୟୁଥ୍ କ୍ଲବର ସଭାପତି ଭାସ୍କର ସାହୁଙ୍କ ନେତୃତ୍ୱରେ ଏକ ମହତ ସେବା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । କ୍ଲବ୍‌ର ଯୁବ ସଦସ୍ୟମାନେ ଜରାଶ୍ରମରେ ରହୁଥିବା ଅନ୍ତେବାସୀ ବୃଦ୍ଧ ପିତା ମାତାଙ୍କୁ ନୂତନ ବସ୍ତ୍ର ପ୍ରଦାନ କରିବା ସହ ଶ୍ରଦ୍ଧାର ସହିତ ଭୋଜନ କରାଇଥିଲେ । ​ଏହି କାର୍ଯ୍ୟକ୍ରମରେ ଗ୍ରାମର ମୁରବୀ ତଥା ସଭାପତି ଗୋଲୋକ ଚନ୍ଦ୍ର ନାୟକଙ୍କ ସମେତ ପାରାଦ୍ୱୀପ ଲକ୍ ଥାନା ଅଧିକାରୀ ରଶ୍ମିରଞ୍ଜନ ଦାସ, ପାରାଦ୍ୱୀପଗଡ଼ ଅଞ୍ଚଳର ବିଜେପି ନାରୀ ନେତ୍ରୀ ରୋଜାଲିନ୍ ନାୟକ, ଆଇନଜୀବୀ ସଞ୍ଜୟ କୁମାର ବେହେରା ଓ ଅନ୍ୟାନ୍ୟ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ରହି ଯୁବକମାନଙ୍କ ଏହି ସମାଜ ମଙ୍ଗଳ କାର୍ଯ୍ୟକୁ ଭୂୟସୀ ପ୍ରଶଂସା କରିଥିଲେ । ଆଜିକାଲିର ଯୁବପିଢ଼ି ନାଚ-ଗୀତ ଓ ମନୋରଞ୍ଜନ ଭିତରେ ବ୍ୟସ୍ତ ରହୁଥିବା ବେଳେ, ମା’ ରାମଚଣ୍ଡୀ ୟୁଥ୍ କ୍ଲବ୍‌ର ଯୁବକମାନେ ନିଃସ୍ୱାର୍ଥପର ଭାବେ ଗରିବଙ୍କ ସେବା, ମାଗଣା ଚିକିତ୍ସା ଶିବିର ଏବଂ ବିଭିନ୍ନ ସାମାଜିକ କାର୍ଯ୍ୟରେ ସକ୍ରିୟ ଯୋଗଦାନ ଦେଇ ସ୍ଥାନୀୟ ଅଞ୍ଚଳରେ ଏକ ନିଆରା ଉଦାହରଣ ସୃଷ୍ଟି କରିଛନ୍ତି । କ୍ଲବ୍‌ର ଏଭଳି ସେବା ମନୋଭାବ ସାଧାରଣରେ ବେଶ୍ ପ୍ରଶଂସାର ପାତ୍ର ପାଲଟିଛି ।