ପାରାଦ୍ୱୀପରେ ପୂଜା ମହୋତ୍ସବ ଅଞ୍ଚଳରେ ସ୍ୱଚ୍ଛତା ଅଭିଯାନ

ପାରାଦ୍ୱୀପ ( ଏନ. ପି.ଓ ) : ସ୍ୱଚ୍ଛତା ହିଁ ସେବା” ବାର୍ତ୍ତାକୁ ନେଇ ପାରାଦ୍ୱୀପ ପୌରପାଳିକା ଓ ରୋଟାରୀ କ୍ଲବ ମିଳିତ ଆନୁକୂଲ୍ୟରେ ରବିବାର ସକାଳେ ଏକ ସାମୁହିକ ସ୍ୱଚ୍ଛତା ଅଭିଯାନ ଅନୁଷ୍ଠିତ ହୋଇଥିଲା। ପାରାଦ୍ୱୀପର କମଳା ସିନେମା ହଲ ନିକଟସ୍ଥ ସାମ୍ବାଦିକ ପ୍ରକୋଷ୍ଠ ଠାରୁ କଲେଜ ଛକ ପର୍ଯ୍ୟନ୍ତ ରାସ୍ତା, ବିଶ୍ୱକର୍ମା ପୂଜା ପେଣ୍ଡାଲ ନିକଟସ୍ଥ ଅଞ୍ଚଳରେ ସଫେଇ କାର୍ଯ୍ୟ କରାଯାଇଥିଲା। ସୂଚନାଥାଉକି ଏହି ପୂଜା ମହୋତ୍ସବରେ ଲକ୍ଷାଧିକ ଜନସମାଗମ ଦୃଷ୍ଟିରୁ ବହୁ ଅଳିଆ ଆବର୍ଜନା କୁ ଦୈନିକ ପୌରପାଳିକା ପକ୍ଷରୁ ସଫେଇ କରାଯାଉଥିବା ବେଳେ ଏହି କାର୍ଯ୍ୟକୁ ବ୍ୟାପକ କରିବାକୁ ଏହି ସ୍ୱଚ୍ଛତା କାର୍ଯ୍ୟକ୍ରମ ଉଦ୍ଦିଷ୍ଟ l
ଏହି ଅଭିଯାନରେ ପାରାଦ୍ୱୀପର ଏନ୍‌ସିସି କ୍ୟାଡେଟ୍‌, ଏନ୍‌ସିସି ଆଲୁମୁନି ସଦସ୍ୟ, ମହିଳା କଲ୍ୟାଣ ଟ୍ରଷ୍ଟ ସମେତ ବହୁ ସ୍ୱେଚ୍ଛାସେବୀ ମିଳିତ ଭାବେ ସାମିଲ ହୋଇ ରାସ୍ତାକଡ଼ ଓ ପୂଜାସ୍ଥଳୀ ନିକଟରେ ପଡ଼ିଥିବା ଅଳିଆ ଆବର୍ଜନା ସଫା କରିଥିଲେ। ଏଥିସହିତ ସାଧାରଣ ଲୋକଙ୍କୁ ସ୍ୱଚ୍ଛତା ପ୍ରତି ସଚେତନ କରାଇବା ସହ ନିଜ ଅଞ୍ଚଳକୁ ସଫା ରଖିବା ପାଇଁ ଆହ୍ୱାନ ଦିଆଯାଇଥିଲା।
ଏହି କାର୍ଯ୍ୟକ୍ରମରେ ପାରାଦ୍ୱୀପ ରୋଟାରୀ କ୍ଲବର ସଭାପତି ଅକ୍ଷୟ ଚନ୍ଦ୍ର ସୁତାର, ସମ୍ପାଦକ ଇଂ. କାଳୀ ପ୍ରସାଦ ମିଶ୍ର, ରୋଟାରିଆନ୍ ଅଲେଖ ଚନ୍ଦ୍ର ସାହୁ, ଡା.ଦୁର୍ଗା ପ୍ରସାଦ ସେଠୀ, କୈଳାସ ମହାରଣା,ପାରାଦ୍ୱୀପ ପୌରପାଳିକା କାର୍ଯ୍ୟନିର୍ବାହୀ ଅଧିକାରୀ ଅଭିଷେକ ପଣ୍ଡା, ବରିଷ୍ଠ ପାରିଷଦ ଅଜିତ କୁମାର ଷଡ଼ଙ୍ଗୀ, ପରିମଳ ବିଶେଷଜ୍ଞ ପ୍ରୀତିରଞ୍ଜନ ପାଢ଼ୀ ପ୍ରମୁଖ ଉପସ୍ଥିତ ଥିଲେ। ଅନ୍ୟମାନଙ୍କ ମଧ୍ୟରେ ପାରାଦ୍ୱୀପ କଲେଜ ଏନ୍‌ସିସି ଆଲୁମୁନି ଆସୋସିଏସନ ର ଉପଦେଷ୍ଟା ଲେଫ୍ଟନାଣ୍ଟ ଅକ୍ଷୟ ଚନ୍ଦ୍ର ମିଶ୍ର, ସଭାପତି ଅମ୍ବିକା ପ୍ରସାଦ ମହାପାତ୍ର, କାର୍ଯ୍ୟକାରୀ ସଭାପତି ଦେବୀ ପ୍ରସାଦ ମିଶ୍ରଙ୍କ ସମେତ ବହୁ ଏନ୍‌ସିସି ଆଲୁମୁନି ସଦସ୍ୟ, କ୍ୟାଡେଟ୍‌ ଓ ସ୍ୱେଚ୍ଛାସେବୀ ଯୋଗଦେଇଥିଲେ। ଅଭିଯାନରେ ଯୋଗଦେଇଥିବା ସମସ୍ତେ ସ୍ୱଚ୍ଛତା କେବଳ ପୌରପାଳିକାର ଦାୟିତ୍ୱ ନୁହେଁ, ବରଂ ପ୍ରତ୍ୟେକ ନାଗରିକଙ୍କର ସାମାଜିକ ଦାୟିତ୍ୱ ବୋଲି ମତ ପ୍ରକାଶ କରିଥିଲେ। ପୂଜା ପରେ ସୃଷ୍ଟି ହେଉଥିବା ଆବର୍ଜନାକୁ ଏଣେତେଣେ ନପକାଇ ନିର୍ଦ୍ଦିଷ୍ଟ ସ୍ଥାନରେ ପକାଇବା ଏବଂ ପାରାଦ୍ୱୀପକୁ ସ୍ୱଚ୍ଛ, ସୁନ୍ଦର ଓ ସୁସ୍ଥ ରଖିବା ପାଇଁ ସମସ୍ତେ ମିଳିତ ଭାବେ ଦାୟିତ୍ୱ ନେବାକୁ ଆହ୍ୱାନ ଦିଆଯାଇଥିଲା। “ସ୍ୱଚ୍ଛ ପାରାଦ୍ୱୀପ, ସୁସ୍ଥ ପାରାଦ୍ୱୀପ” ଗଠନ ଲକ୍ଷ୍ୟରେ ଏଭଳି ମିଳିତ ସ୍ୱଚ୍ଛତା ଅଭିଯାନ ଆଗାମୀ ଦିନରେ ମଧ୍ୟ ଜାରି ରହିବ ବୋଲି ଉପସ୍ଥିତ ସ୍ୱେଚ୍ଛାସେବୀମାନେ କହିଥିଲେ।