ଜଗତସିଂହପୁର ଜିଲ୍ଲାରେ ବନ୍ୟା ଜନିତ ପରିସ୍ଥିତି ର ମୁକାବିଲା ନିମନ୍ତେ ଜିଲ୍ଲା ପ୍ରଶାସନର ତ୍ୱରିତ ପଦକ୍ଷେପ

ଜଗତସିଂହପୁର ( ଏନ. ପି.ଓ ) : ଲଘୁଚାପ ପ୍ରଭାବରେ ଗତ କିଛି ଦିନ ଲଗାଣ ବର୍ଷା ଯୋଗୁଁ ଜିଲ୍ଲାରେ ବନ୍ୟା ସ୍ଥିତି ଉପୁଜିଛି । ଜିଲ୍ଲାରେ ବନ୍ୟା ଜନିତ ସ୍ଥିତି ନିମନ୍ତେ ଗତକାଲି ଜିଲ୍ଲାପାଳ ଶ୍ରୀ ଜେ ସୋନାଲ କ୍ଷେତ୍ରୀୟ ପରିଦର୍ଶନ କରିବା ସହ ଅଧିକାରୀମାନଙ୍କ ସହିତ ସମୀକ୍ଷା କରି ବିଭାଗୀୟ ଅଧିକାରୀ ମାନଙ୍କୁ ସତର୍କ ରହିବାକୁ ନିର୍ଦ୍ଦେଶ ଦେଇଥିଲେ ।

ଆଜି ଅପରାହ୍ନ ୪.୦୦ ଘଟିକା ସୁଦ୍ଧା ଜିଲ୍ଲା ଜରୁରୀ ବିଭାଗ ପକ୍ଷରୁ ପ୍ରାପ୍ତ ସୂଚନା ଅନୁଯାୟୀ ଜିଲ୍ଲାରେ ବନ୍ୟାଜଳ ପ୍ରବାହିତ ହେବା ଯୋଗୁ ଜିଲ୍ଲାର କୁଜଙ୍ଗ ଓ ତିର୍ତ୍ତୋଲ ବ୍ଲକର ୧୦ଟି ଗ୍ରାମ ପଞ୍ଚାୟତ ଏବଂ ୧୨ଟି ଗ୍ରାମ ପ୍ରଭାବିତ ହୋଇଛି । ଏହି ବନ୍ୟା ପରିସ୍ଥିତି ଯୋଗୁଁ ମୋଟ ୧୯୩୮ ଜଣ ଲୋକ ପ୍ରଭାବିତ ହୋଇଥିବାବେଳେ, ସୁରକ୍ଷା ଦୃଷ୍ଟିରୁ ୮୨୨ ଜଣଙ୍କୁ ସ୍ଥାନାନ୍ତର କରାଯାଇ ୬ଟି ରିଲିଫ୍ କେନ୍ଦ୍ରରେ ରଖାଯାଇଛି । ଏହି ସମସ୍ତ ରିଲିଫ୍ କେନ୍ଦ୍ରରେ ୮୨୨ ଜଣଙ୍କୁ ମାଗଣା ରନ୍ଧା ଖାଦ୍ୟ ଯୋଗାଇ ଦିଆଯାଉଛି । ୬ ଟି ଫ୍ରୀ କିଚେନ ସେଣ୍ଟର୍ ରେ ଲୋକମାନଙ୍କୁ ଶୁଖିଲା ଓ ରନ୍ଧା ଖାଦ୍ୟ ପ୍ରଦାନ କରାଯାଉଛି । ରିପୋର୍ଟ ଅନୁଯାୟୀ, ଏପର୍ଯ୍ୟନ୍ତ କୌଣସି ମାନବୀୟ ମୃତ୍ୟୁ କିମ୍ବା ପଶୁଧନର ମୃତ୍ୟୁ ଘଟିନାହିଁ ।
ଜରୁରୀକାଳୀନ ରିଲିଫ୍ ଭାବେ ଏପର୍ଯ୍ୟନ୍ତ ୯.୫୦ କିଲୋଗ୍ରାମ୍ ଚୁଡ଼ା, ୧.୬୦ କିଲୋଗ୍ରାମ୍ ଗୁଡ଼/ଚିନି ଏବଂ ୪୦ଟି ପଲିଥିନ୍ ରୋଲ୍ ବଣ୍ଟନ କରାଯାଇଛି। ଏହା ସହିତ ୨୦ ପ୍ୟାକେଟ୍ ମହମବତୀ ଏବଂ ୧୦ ବଣ୍ଡଲ୍ ଦିଆସିଲି ଯୋଗାଇ ଦିଆଯାଇଛି । ଲୋକଙ୍କ ଚିକିତ୍ସା ସେବା ପାଇଁ ୩ଟି ମେଡିକାଲ୍ ଟିମ୍ ଏବଂ ପଶୁ ଚିକିତ୍ସା ସେବା ପାଇଁ ୫ଟି ପ୍ରାଣୀ ଚିକିତ୍ସା ଟିମ୍ ନିୟୋଜିତ କରାଯାଇଛି ।ଜରୁରୀକାଳୀନ ଉଦ୍ଧାର ଓ ରିଲିଫ୍ କାର୍ଯ୍ୟ ପାଇଁ ୪ଟି ଡଙ୍ଗା/ବୋଟ୍ ନିୟୋଜିତ ହୋଇଛି । ପାନୀୟ ଜଳ ଯୋଗାଣ ପାଇଁ ୩ଟି ଜଳ ଟ୍ୟାଙ୍କର ବ୍ୟବସ୍ଥା କରାଯାଇଛି ।

ବନ୍ୟା ପରିସ୍ଥିତିରେ ପ୍ରାଣୀ ସମ୍ପଦର ସୁରକ୍ଷା ଓ ପଶୁପାଳକଙ୍କୁ ଆବଶ୍ୟକ ସହାୟତା ପ୍ରଦାନ ଉଦ୍ଦେଶ୍ୟରେ ପ୍ରାଣୀ ସମ୍ପଦ ବିକାଶ ବିଭାଗ ପକ୍ଷରୁ ଜଗତସିଂହପୁର ଜିଲ୍ଲାର କୁଜଙ୍ଗ ବ୍ଳକରେ ୧୫ କ୍ୱିଣ୍ଟାଲ ଗୋ-ଖାଦ୍ୟ ଓ ୨୦ କ୍ୱିଣ୍ଟାଲ ସବୁଜ ଚାରା ଏବଂ ତିର୍ତ୍ତୋଲ ବ୍ଲକରେ ୯ କ୍ୱିଣ୍ଟାଲ ଗୋ -ଖାଦ୍ୟ ଓ ୧୩ କ୍ୱିଣ୍ଟାଲ ସବୁଜ ଚାରା ବଣ୍ଟନ କରାଯାଇଛି ।

ସ୍ଵାସ୍ଥ୍ୟ ବିଭାଗ ପକ୍ଷରୁ ପରିସ୍ଥିତିର ମୁକାବିଲା ପାଇଁ ଜିଲ୍ଲାର ବିଭିନ୍ନ ବ୍ଲକରେ ୬ଟି ମୋବାଇଲ ମେଡିକାଲ ଟିମ୍ (MMT) ଏବଂ ୯ଟି ରାପିଡ୍ ରେସ୍ପନ୍ସ ଟିମ୍ (RRT) ନିୟୋଜିତ କରାଯାଇଛି । ୨ ଜଣ ଗର୍ଭବତୀ ମହିଳାଙ୍କୁ ନିକଟସ୍ଥ ସ୍ଵାସ୍ଥ୍ୟ କେନ୍ଦ୍ର କୁ ସ୍ଥାନାନ୍ତରିତ କରାଯାଇଛି । ଜିଲ୍ଲାର ବିଭିନ୍ନ ବ୍ଲକରେ ମୋଟ ୨୪୯୫ଟି କୂଅରେ ପାଣି ବିଶୋଧନ କରାଯାଇଛି । ଜିଲ୍ଲାରେ ବନ୍ୟା/ଜଳବନ୍ଦୀ ପରିସ୍ଥିତି ପାଇଁ ପର୍ଯ୍ୟାପ୍ତ ପରିମାଣରେ ଔଷଧ ଓ ଚିକିତ୍ସା ସାମଗ୍ରୀ ମହଜୁଦ ରହିଛି । କୁଜଙ୍ଗ ବ୍ଲକରେ ୨୯ଟି ସାମାନ୍ୟ ରୋଗୀଙ୍କୁ ଚିକିତ୍ସା ଯୋଗାଇ ଦିଆଯାଇଥିବା ସହ ୪୬ଟି ORS ବଣ୍ଟନ କରାଯାଇଛି ।

ଜିଲ୍ଲା ପ୍ରଶାସନ ପକ୍ଷରୁ ପ୍ରଭାବିତ ଅଞ୍ଚଳରେ ରିଲିଫ୍, ଉଦ୍ଧାର ଓ ଆବଶ୍ୟକ ସେବା ଯୋଗାଣ କାର୍ଯ୍ୟ ଜାରି ରହିଛି । ସନ୍ଧ୍ୟା ୫ ଘଟିକା ସୁଦ୍ଧା ପ୍ରାପ୍ତ ସୂଚନା ଅନୁଯାୟୀ ବର୍ଷା ର ପ୍ରଭାବ କମିଥିବାରୁ ହୀରାକୁଦ ଜଳଭଣ୍ଡାର ର ୩ ଗେଟ୍ ବନ୍ଦ ସହ ୧୯ ଗେଟ୍ ଖୋଲା ରହିଛି।ପରିସ୍ଥିତି ଉପରେ ନିରନ୍ତର ନଜର ରଖାଯାଇଥିବା ସହ ଆବଶ୍ୟକତା ଅନୁଯାୟୀ ତତ୍କାଳ ପଦକ୍ଷେପ ଗ୍ରହଣ କରାଯାଉଛି । ଜିଲ୍ଲାପାଳ ଆଜି ମଧ୍ୟ କ୍ଷେତ୍ରୀୟ ଅଧିକାରୀ ମାନଙ୍କ ସହ ବନ୍ୟା ସ୍ଥିତି ସମ୍ପର୍କରେ ଆଲୋଚନା କରିଥିଲେ ।