ପବିତ୍ର ବିଜୟାଦଶମୀ ଅବସରରେ ପାରାଦ୍ଵୀପ ସାଗର କ୍ଲବ ପକ୍ଷରୁ ୩୫ ତମ ରାବଣ ପୋଡି ଉତ୍ସବ ବିଜୁ ମଇଦାନ ଠାରେ ଅନୁଷ୍ଠିତ ହୋଇଯାଇଛି

ପାରାଦ୍ଵୀପ ( ଏନ. ପି.ଓ ) : ପବିତ୍ର ବିଜୟାଦଶମୀ ଅବସରରେ ପାରାଦ୍ଵୀପ ସାଗର କ୍ଲବ ପକ୍ଷରୁ ୩୫ ତମ ରାବଣ ପୋଡି ଉତ୍ସବ ବିଜୁ ମଇଦାନ ଠାରେ ଅନୁଷ୍ଠିତ ହୋଇଯାଇଛି । ଏହି ଉତ୍ସବରେ ମୁଖ୍ୟ ଅତିଥି ଭାବରେ ଜଗତସିଂହପୁର ସାଂସଦ ବିଭୂପ୍ରସାଦ ତରାଇ, ପାରାଦ୍ଵୀପ ପୌରପରିଷଦର ଅଧ୍ୟକ୍ଷ ବସନ୍ତ ବିଶ୍ଵାଳ ଙ୍କ ସମେତ,ପାରିଷଦ ଓ ବହୁ ବିଶିଷ୍ଟ ବ୍ୟକ୍ତି ଯୋଗ ଦେଇଥିଲେ । ପ୍ରଥମେ ପ୍ରଦୀପ ପ୍ରଜ୍ୱଳନ କରି କାର୍ଯ୍ୟକ୍ରମକୁ ଉଦଘାଟନ କରିଥିଲେ ମାନ୍ୟବର ସାଂସଦ ବିଭୂ ପ୍ରସାଦ ତରାଇ । ପରେ ସ୍ଥାନୀୟ କଳାକାରଙ୍କ ଦ୍ୱାରା ବନ୍ଦେ ଉତ୍କଳ ଜନନୀ ଗାନ କରାଯାଇଥିଲା । ରାଜ୍ୟ ଓ ଦେଶରେ ସତ୍ଯ, ଧର୍ମ, ନ୍ୟାୟ ଓ ଅହିଂସାର ପ୍ରତିଷ୍ଠା ପାଇଁ ଅଧର୍ମ, ଅନ୍ୟାୟ ଓ ଅନୀତିର ପ୍ରତିକ ରୂପୀ ରାବଣକୁ ପୋଡି ନଷ୍ଟ କରି ନିଜ ନିଜ ମଧ୍ଯରେ ଭାଇଚାରା ସୃଷ୍ଟି କରିବା ସହିତ ବିକଶିତ ପାରାଦ୍ଵୀପ ଓ ବିକଶିତ ଓଡିଶା ଓ ବିକଶିତ ଭାରତ ଗଠନ ପାଇଁ ଆହ୍ବାନ ଦେଇଥିଲେ ସାଂସଦ ବିଭୂପ୍ରସାଦ ତରାଇ । ସେହିପରି ନିଜ ନିଜ ଭିତରେ ଥିବା ହିଂସାକୁ ଦୂର କରି ଅସାମାଜିକ କାର୍ଯ୍ୟରୁ ଦୂରେଇ ରହି ସମାଜର ମଙ୍ଗଳ ପାଇଁ ଏବଂ ପାରାଦ୍ଵୀପ ର ବିକାଶ ପାଇଁ ସମସ୍ତେ ଆଗକୁ ଆସି ଏକ ହୋଇ କାର୍ଯ୍ୟ କଲେ ପାରାଦ୍ଵୀପ ଆହୁରି ଆଗକୁ ଯାଇପାରିବ ବୋଲି ପୌର ପରିଷଦର ଅଧ୍ୟକ୍ଷ ତାଙ୍କ ବକ୍ତବ୍ୟରେ କହିଥିଲେ ।ପରେ କଳିଙ୍ଗ ବାଲିଯାତ୍ରା ପଡିଆରେ ବାଣ ପ୍ରତିଯୋଗୀତା ଅନୁଷ୍ଠିତ ହୋଇଥିଲା । ଶେଷରେ ରାବଣ ଙ୍କ ଦେହରେ ଅଗ୍ନି ସଂଯୋଗ କରିଥିଲେ ମାନ୍ୟବର ସାଂସଦ ବିଭୂପ୍ରସାଦ ତରାଇ । ଏହି କାର୍ଯ୍ୟକ୍ରମକୁ ଦେଖିବା ପାଇଁ ହଜାର ହଜାର ଦର୍ଶକ ଙ୍କ ସମାଗମ ଦେଖିବାକୁ ମିଳିଥିଲା ।