ଜମି ବେପାର ନାମରେ ୩ କୋଟି ଠକେଇ ଘଟଣା, ଟଙ୍କା ଫାଙ୍କିବାକୁ ଏବେ ଚାଲିଛି ନୂଆ ପ୍ରୟାସ

ପାରାଦ୍ଵୀପ ( ଏନ. ପି.ଓ ) : ଜମି ବେପାର ନାମରେ ୩ କୋଟି ଠକେଇ ଘଟଣା । ମୂଳ ଟଙ୍କା ମାଗିବାରୁ ଆସୁଛି ଧମକ । ଟଙ୍କା ଫାଙ୍କିବାକୁ ଏବେ ଚାଲିଛି ନୂଆ ପ୍ରୟାସ । ଏଭଳି ଘଟଣା ଘଟିଛି ଅଭୟଚାନ୍ଦପୁର ଥାନା ଅନ୍ତର୍ଗତ ଭୂତମୁଣ୍ଡାଇ ଗ୍ରାମରେ । ଅଭିଯୋଗ ମୁତାବକ ସିତାଂଶୁ ମହାପାତ୍ର ଓ ଉମାକାନ୍ତ ପରିଜା ନାମକ ଦୁଇଜଣ ବ୍ୟକ୍ତି ସାଂସୁଦ ଇନଫ୍ରା ନାମକ ଏକ କମ୍ପାନୀ ଖୋଲି ସ୍ଥାନୀୟ ରଙ୍ଗିଆଗଡ ଗ୍ରାମ ପାଖରେ କିଛି ଜମି କିଣି ତାକୁ ପ୍ଲଟିଂ କରି ବିକ୍ରି କରୁଥିବା ବେଳେ ଉକ୍ତ ବ୍ୟବସାୟରେ ରାଜେନ୍ଦ୍ରଙ୍କୁ ମିଶିବାକୁ ଅଫର ଦେଇଥିଲେ । ବ୍ୟବସାୟରେ ଭାଗିଦାରୀ କରିବାକୁ ରାଜେନ୍ଦ୍ରଙ୍କ ଠାରୁ ଆକାଉଣ୍ଟରେ ଦେଢ କୋଟି ଓ କ୍ୟାସ ଆକାରରେ କୋଟିଏ ଷାଠିଏ ଲକ୍ଷ୍ୟ ନେଇଥିଲେ । କିଛି ମାସ ପରେ ରାଜେନ୍ଦ୍ର ଲାଭ, କ୍ଷତିର ହିସାବ ମାଗିବାରୁ ତାଙ୍କୁ ପଇସା ନଦେଇ ତାଙ୍କୁ ଚେକ ଧରାଇଦେଇଥିଲେ। ଚେକ୍ ବାଉଁଶ ହୋଇଥିବାର ରାଜେନ୍ଦ୍ର କହିବାରୁ ଫୋନରେ ଧମକ ଆସୁଛି । ଅନ୍ୟପଟେ ଗଣମାଧ୍ୟମରେ ସଫେଇ ଦେଇ ସିତାଂଶୁ ଓ ଉମାକାନ୍ତ କହିଛନ୍ତି ଯେ,ରାଜେନ୍ଦ୍ର କମ୍ପାନୀର ନିର୍ଦ୍ଦେଶକ ଅଛନ୍ତି ଏବଂ ସମସ୍ତ ଟଙ୍କା ତାଙ୍କ ଦ୍ଵାରା କାରବାର କରାଯାଇଛି । ଆମକୁ ମିଥ୍ୟା କେସରେ ରାଜେନ୍ଦ୍ର ଫସାଉଛନ୍ତି । ଯାହାକୁ ଖଣ୍ଡନ କରିଛନ୍ତି ରାଜେନ୍ଦ୍ର। କମ୍ପାନୀର ୪୭ % ସେୟାର ଉକ୍ତ ଦୁଇଜଣ ନିକଟରେ ଥିବା ବେଳେ ମୁଁ ମାତ୍ର ୨ % ସେୟାର ହୋଲ୍ଡର ଅଛି ବୋଲି ଏକ ସାମ୍ବାଦିକ ସମ୍ମିଳନୀରେ ସଫେଇ ଦେଇଛନ୍ତି। ଅନ୍ୟପଟେ ଉକ୍ତ କମ୍ପାନୀ କିଛି ସ୍ଥାନୀୟ ଲୋକଙ୍କ ଠାରୁ ଜମି ନେଇଥିଲେ ବି ଟଙ୍କା ନ ଦେଇ ଆଉ ଧରାଛୁଆଁ ଦେଉନଥିବା ଅଭିଯୋଗ ହୋଇଛି । ଅନ୍ୟ ପଟେ ସାଂସୁଦ ଇନଫ୍ରା କମ୍ପାନୀ ଅଧିକାରୀଙ୍କ ସହ ଯୋଗାଯୋଗ କରାଯାଇଥିଲେ ମଧ୍ୟ ଯୋଗାଯୋଗ ହୋଇପାରିନାହିଁ ।