ଯୁବପିଢିଙ୍କ ସୁସ୍ଥ ଭବିଷ୍ୟତ ପାଇଁ ଜଗତସିଂହପୁରରେ 'ତମାଖୁ ମୁକ୍ତ ଯୁବ ଅଭିଯାନ ୪.୦ର ଶୁଭାରମ୍ଭ , ନିଶାମୁକ୍ତ ସମାଜ ଗଠନ ପାଇଁ ଆହ୍ୱାନ ।
sumanta swain | 11 Nov 2026 | 11 min read | 104 views
News Prime Odisha
ଜଗତସିଂହପୁର ( ଏନ. ପି.ଓ ) : ଯୁବପିଢ଼ି ହେଉଛନ୍ତି ଦେଶର ଭବିଷ୍ୟତ ଓ ସମାଜର ପ୍ରଗତିର ପ୍ରକୃତ ସାରଥୀ l ସେମାନଙ୍କ ଜୀବନରେ ସୁସ୍ଥତା, ସଚେତନତା ଓ ଉଜ୍ୱଳ ଭବିଷ୍ୟତର ସ୍ବପ୍ନ ଭରିଦେବା ଉଦ୍ଦେଶ୍ୟରେ ଜଗତସିଂହପୁର ଜିଲ୍ଲାରେ ୨୦୨୬–୨୦୨୭ବର୍ଷ ପାଇଁ 'ତମାଖୁ ମୁକ୍ତ ଯୁବ ଅଭିଯାନ ୪.୦ ର ଆଜି ସ୍ୱାମୀ ବିବେକାନନ୍ଦ ସ୍ମାରକୀ ମହାବିଦ୍ୟାଳୟ, ଜଗତସିଂହପୁର ର ସଭା ଗୃହରେ ଅନୁଷ୍ଠାନିକ ଶୁଭାରମ୍ଭ ହୋଇଯାଇଛି l ଜିଲ୍ଲା ମୁଖ୍ୟ ଚିକିତ୍ସା ଅଧିକାରିଣୀ ଡାକ୍ତର ସ୍ନିଗ୍ଧାମୟୀ ମହାନ୍ତି ଏହି ସଚେତନତାମୂଳକ ଅଭିଯାନର ଶୁଭାରମ୍ଭ କରି ଏକ ସୁସ୍ଥ, ସୁନ୍ଦର ଓ ନିଶାମୁକ୍ତ ସମାଜ ଗଠନ ପାଇଁ ସମସ୍ତଙ୍କୁ ଏକଜୁଟ ହେବାକୁ ଆହ୍ୱାନ ଦେଇଥିଲେ l ଏହି ଅବସରରେ ଜିଲ୍ଲା ଜନସ୍ୱାସ୍ଥ୍ୟ ଅଧିକାରୀ,ଜିଲ୍ଲାମୁଖ୍ୟ ଚିକିତ୍ସାଳୟ ର ଅଧିକ୍ଷକ, ଅତିରିକ୍ତ ଜିଲ୍ଲା ଜନ ସ୍ୱାସ୍ଥ୍ୟ ଅଧିକାରୀ (ରୋଗ ନିୟନ୍ତ୍ରଣ), ଜିଲ୍ଲାସ୍ଥରୀୟ ଅନ୍ୟବିଭାଗର ଅଧିକାରୀଙ୍କ ସମେତ ମହାବିଦ୍ୟାଳୟର ଅଧ୍ୟାପକ, ଅଧ୍ୟାପିକା, ଛାତ୍ରଛାତ୍ରୀ ଏବଂ ସ୍ୱାସ୍ଥ୍ୟ ବିଭାଗର ସମସ୍ତ କର୍ମଚାରୀ ଉପସ୍ଥିତ ରହି ଅଭିଯାନକୁ ସଫଳ କରିବା ପାଇଁ ନିଜର ସହଭାଗିତା ପ୍ରକାଶ କରିଥିଲେ l ଜିଲ୍ଲା ଜନସ୍ୱାସ୍ଥ୍ୟ ଅଧିକାରୀ ନିଜ ବକ୍ତବ୍ୟରେ ତମାଖୁ ଓ ବିଭିନ୍ନ ନିଶାଦ୍ରବ୍ୟର ଭୟାବହ କୁପ୍ରଭାବ ସମ୍ପର୍କରେ ଯୁବପିଢିଙ୍କୁ ସଚେତନ କରିବାସହ ଏହି ନିଶା କିପରି ମଣିଷର ଶାରୀରିକ ସୁସ୍ଥତା, ମାନସିକ ଶାନ୍ତି, ପାରିବାରିକ ସମ୍ପର୍କ ଓ ସାମାଜିକ ଜୀବନକୁ ପ୍ରଭାବିତ କରେ, ସେଥିପ୍ରତି ସମସ୍ତଙ୍କୁ ସତର୍କ ରହିବାକୁ ପରାମର୍ଶ ଦେଇଥିଲେ l ବିଶେଷକରି ବିଦ୍ୟାଳୟ, ମହାବିଦ୍ୟାଳୟ ଓ ବିଭିନ୍ନ ଯୁବ ସଂଗଠନକୁ ଏହି ଅଭିଯାନର ମୁଖ୍ୟ ମାଧ୍ୟମ କରି ଛାତ୍ରଛାତ୍ରୀ ଓ ଯୁବସମାଜ ମଧ୍ୟରେ ବ୍ୟାପକ ସଚେତନତା ସୃଷ୍ଟି କରିବା ଉପରେ ଗୁରୁତ୍ଵାରୋପ କରାଯାଇଥିଲା l କାରଣ ନିଶାମୁକ୍ତ ଯୁବସମାଜ ହିଁ ଏକ ସୁସ୍ଥ ପରିବାର, ସୁସ୍ଥ ସମାଜ ଓ ସମୃଦ୍ଧ ରାଷ୍ଟ୍ରର ମୂଳଦୁଆ l ଅଭିଯାନର ଶେଷ ପର୍ଯ୍ୟାୟରେ ଉପସ୍ଥିତ ସମସ୍ତ ଅତିଥି, ଅଧିକାରୀ ଓ କର୍ମଚାରୀ ନିଜେ ତମାଖୁ ଓ ନିଶାଦ୍ରବ୍ୟଠାରୁ ସଦାସର୍ବଦା ଦୁରେଇ ରହିବ ସହ ଅନ୍ୟମାନଙ୍କୁ ଏହାର କୁପରିଣାମ ବିଷୟରେ ସଚେତନ କରାଇବାକୁ ଶପଥ ଗ୍ରହଣ କରିଥିଲେ। ଛାତ୍ର ଛାତ୍ରୀ ଙ୍କ ମଧ୍ୟରେ ଏକ କୁଇଜ ପ୍ରତିଯୋଗିତା କରାଯାଇଥିଲା।ଏହି ଅଭିଯାନ କେବଳ ଏକ ସରକାରୀ କାର୍ଯ୍ୟକ୍ରମରେ ସୀମିତ ନରହି ପ୍ରତ୍ୟେକ ଯୁବକଙ୍କ ମନରେ ସୁସ୍ଥ ଜୀବନର ସଂକଳ୍ପ ଜାଗ୍ରତ କରିବାସହ ଜଗତସିଂହପୁର ଜିଲ୍ଲାକୁ ଏକ ନିଶାମୁକ୍ତ ଜିଲ୍ଲା ଭାବେ ଗଢ଼ିତୋଳିବାରେ ଏକ ନୂତନ ଦିଗନ୍ତ ସୃଷ୍ଟି କରିବ ବୋଲି ଆଶା ପ୍ରକାଶ ପାଇଛି ଏହି କାର୍ଯ୍ୟକ୍ରମକୁ ଏ.ଏମ୍.ଏନ ସି ଡି ଶ୍ରୀମତୀ ସୁଜାତା କବି ପରିଚାଳନା କରିଥିବା ବେଳେ ଡାଟା ମ୍ୟାନେଜର ପ୍ରଭାସ କୁମାର ବେହେରା ସହାୟତା କରିଥିଲେ। ଶେଷରେ ସହକାରୀ ଜିଲ୍ଲା ଜନସ୍ୱାସ୍ଥ୍ୟ ଯୋଗାଯୋଗ ଅଧିକାରୀ ସୁବ୍ରତ କୁମାର ମହାପାତ୍ର ସମସ୍ତ ଅତିଥି ମାନଙ୍କୁ ଧନ୍ୟବାଦ ଅର୍ପଣ କରି ସଭା ସାଙ୍ଗ କରିଥିଲେ ।
© 2026 News Prime Odisha | Content is protected under the Copyright Act, 1957
Comments (0)
Loading comments...

